2022-jıl 25-iyun kúni Ekonomika fakulteti Turizm bakavr baǵdarı studentleri qatnasında Taxtakópir rayonına olarıdıń praktikalıq bilimlerin asırıw maqsetinde sayaxat shólkemlestirdim. Sayaxatqa studentler menen birgelikte GIZ turizm boyınsha eksperti Dr. Nicole Heausler, Turizm ministrligi bólim baslıǵı Húrmet Jalimbetov, Savickiy atındaǵı muzey gidleri Irina Petrushina hám Miyrigul Erekeevalar, universitettiń Awdarma teoriyası hám ámeliyatı kafedrası assistenti Sarbinaz Baymuratova, doktorant Nurzada Atamuratovalar qatnastı.
Studentlerimz praktikada Jipek Joli miymanxanasında bolǵanlıǵı, miymanımız Dr. Nicole da miymanxanada jaylasqanlıǵı sebepli sayaxattı Jipek Joli miymanxanasınan basladıq. Taxtakópir rayonında rayon hákimi Jambul Adilov kútip aldı. Sayaxatımızdıń tiykarǵı maqseti Taxtakópir rayonınıń turistlik potencialın anıqlaw, jańa turistlik marshrutlardı islep shıǵıw, awıl xalqın hám isbilermenlerin usı tarawǵa tartıw boyınsha usınıslar islep shıǵıwdan ibarat edi. Rayon hákimi Jambul Adilov penen ushırasıwda toparımız benen birge hakim orınbasarı Quwatbay Dáribaev hám hákim járdemshisi Bolat Tolegenov qatnastı. Ushırasıwda rayonda turizmdi rawajlandırıw boyınsha piker alısıldı hám Qaratereń kóli potencialınan paydalanıw, Dawqara APJda miyman úylerin qurıw boyınsha usınıslar berildi.
Házirgi jaz kúnleri analizlerimiz boyınsha kúnine 100 den aslam, al dem alıs kúnleri 250-300 adam kólde shomlıw, dem alıw maqsetinde keledi. Dem alıwshılar tiykarınan Shimbay, Qaraózek rayonları hám Nókis qalasınan, sonday-aq, qubla rayonlardan da keledi.
Ushırasıwdan keyin Qaratereń kóline qaray jol aldıq.
Dawamı bar….