Rayon hákimi J.Adilov penen ushırasıwdan keyin hakim orınbasarı Q.Daribaev hám hákim járdemshisi B.Tolegenovlar menen birge Dawqara APJna awıl xalqı hám isbilermenleri menen ushırasıwǵa bardıq. Ushırasıw dawamında Dr. Nicole hám Turizm ministrligi bólim baslıǵı H.Jalimbetovlar menen birgelikte awılda miyman úylerin shólkemlestiriw, Qaratereń kóline keletuǵın dem alıwshılar ushın qolaylı servis xızmetin kórsetiw boyınsha usınıslarımızdı berdik. Ushırasıwda qatnasıwshılar qızıqtırǵan sorawlarına juwaplar aldı.
Ushırasıwdan keyin Qaratereń kóline jol aldıq. Qaratereńde shólkemlestirilgen qaraúylerdiń iyesi Tursınbay aǵa menen sáwbetlestik. Qaratereńge shomlılıwǵa kúnine 100 den aslam, al dem alıs kúnleri 250-300 adam keletuǵınlıǵı haqqında sóz etildi. Sáwbet dawamında isbilermenimizdiń jumısların ele jetilistiriw boyınsha másláhátler berildi.
Kól boyında awqatlanǵanımızda awqatlanıw servisi hám sanuzel sistemaların jaqsılaw kerek ekenligi anıqlandı. Kóldıń jaǵası Bórshitaw etegi ájayıp kórinis. Taw basına shekem 75-80 metr biyiklik, alpinistlik sheberlikti sınap kóriwge qolay. Sonday-aq, kól boyında 500 metr jer astınan artizan qudıǵınan suw aǵıp tur. Duwdıń ıssılıǵı 37-40 gradus. Bunnan rekreaciyalıq maqsetlerde paydalanıw boyınsha sanator-kurort sistemasın qurıw joybarları bar ekenligin hákim orınbasarı sóz etti.
Tósten keyin Borshitaw APJ aymaǵına bardıq. Bul jerge ótken saparı prezident kelgenliginen hámmemizdiń xabarımız bar. Awıl abat awıl joybarına kiritilip barlıq soxiallıq infrastruktura jaqsılanǵan. Awıl xalǵı miymandos, qálegen úyde quday qonaq bolıp qalıwǵa boladı. Bórshitaw jırası 30-40 kmge sozılǵanlıǵı, bul jerde túyede sayaxat etiw, sharwalar ómiri menen tanısıw sıyaqlı agroturizm baǵdarlarınan paydalanıwǵa qolay. Sonday-aq, ekstremal turistler ushın avto hám motorallilar shólkemlestiriw múmkin.
